Leiðinlegar laugarnar - laug Arnar

Ég hef verið að vinna að brúnkunni með töluverðum árangri, þið verðið ekki svikin þegar þið sjáið mig í Laugunum eftir mánuð. Bjórinn sér ístrunni fyrir fyllingu og er það vel. Svei þeim karlmönnum sem berjast við ístruna eins og óvin, svei þeim hégóma. Best er þegar maginn er fullur af hráskinku, ostum, pylsum, bjórum og í hálsinum og munninum er ekki pláss fyrir orð bara dæs, bara dæs.

Og ég sem ætlaði að ganga út með Eyjafirði og gista í tjaldi. Nú þori ég því ekki. Ég vil ekki vakna upp með órökuðum Birni eða hugsanlega ekki vakna upp. Ha? Reyndar á ég svissneskan vasahníf með sög og naglaþjöl og þótti beita Osoto Otoshi af töluverðri natni. Og hver er munurinn á Óda og ísbirni? Enginn. Ef ég mætti Birni órökuðum myndi ég finta hann eins og það heitir á handboltamáli - finta að hætti Eggertsonar Þorleifssonar Valsmanns, eða Halldórs Haukamanns. Anthony Hopkins lék í Nóbelsverðlaunamynd fyrir nokkrum árum. Þar leikur hann mógul sem týnist í óbyggðum ásamt nokkrum öðrum. Þar lenda þeir í slag við skógarbjörn, skógarbjörninn hefur bara áhuga á svarta manninum í hópnum og endar með því að éta hann. Ekki fallegur boðskapur það. Nú lít ég út eins og svarti maðurinn - kannski mæti ég ísbirni með hvítan strýtuhatt og kyndil uppi á heiðum.

Óskaplega geta stórþjóðirnar kúkað í buxan sín í fótbolta; vonarstjörnurnar Portúgal og Holland með kúk upp á bak. Rússland var vopnað blautklútum og barnasálfræði og Holland sofnaði vært úti í vagni. Spánverjar gætu farið á límingunum í kvöld; þeir eru bestir en þeirra eigin haus er þeirra versti óvinur. Ítalir eru þeirra Svíagrýla. Þær falla reyndar á endanum.

Unnur og Grímur kláruðu skólann á föstudaginn. Námsárangur frábær. Unnur þótti sýna einstakan árangur í spænsku. Lokahóf var síðan haldið að skóla loknum og var það prýðileg skemmtan. Unnur tók þátt í danssýningu og Grímur fékk medalíu fyrir þáttöku í fótbolta sem hann reyndar gafst upp á á endanum. Magnað hvernig þessi grey hafa sigrast á einu og öðru undanfarið ár. Það er ekki lítið á þetta fólk lagt.  

Hvað er verst þegar maður er að læra tungumál? Að fá símhringingu; kannski frá banka, eða skólanum eða íþróttadeild bæjarins sem tjáir manni að hugsanlega sé maður kominn inn af biðlista og blah blah. Oft skilur maður ekkert fyrstu mínútuna - síðan kemur eitthvað stikkorð, aha. Svo giskar maður á erindið út frá samhengi og reynir að hiksta eitthvað. Spánverjar eru reyndar afar kurteisir og þolinmóðir við þessar aðstæður. Margur íslendingurinn væri margbúinn að skella margsinnis á þennan helvítis útlending.

Bretarnir okkar eru í heimsókn. Unnur sýnir góða tilburði í enskunni og Grímur skellti flottu thank you út úr sér þegar hann fékk einhverja gjöf.  

Hitinn þessa dagana er rosalegur. Madridíngar tala um"höggið". Því sumarhitinn skellur eiginlega á í kringum miðjan júní. Allt í einu. Og síðan fer hann ekkert. Það eru engar sveiflur. Bara 35 stig í þrjá mánuði. 

Ég elska tennis. Wimbledon fer að byrja. Og ég mun sitja með gin og tónik og njóta þess. Stúdera teoríuna og rassskella síðan Nafna og Örra þegar ég hitti þá næst. Já, meðan ég man, í vikunni tók ég stöðupróf í tennis. Bullandi stressaður tók ég við uppgjöfum frá kennaranum og leið eins og bólugröfunum unglingi í stæ 102. Reyndar er ekki ljóst á þessu stigi hvort einhver pláss eru eftir en við skululum sjá til. Ég gæti líka keypt mér borðtennisborð og stuttar buxur a la Guðjón og sett annan borðshelminginn upp og spilað við sjálfan mig. Ekkert að því að spila við sjálfan sig ef annað þrýtur.

Langt síðan ég hef heyrt í Mo Shark og Ljót og Guð-jón er enn að glíma við 9-11 árasirnar á tvíburasörverinn í MA. 

"Yes, until 1989 beer was banned in Iceland" "Why?" Uh. Stundum verður manni svarafátt.

Spænsk götufyllerí. Þau heita Botellón. Reyndar hef ég aldrei orðið beint vitni að þeim. En mig grunar að þau fari fram með eftirfarandi hætti: spánskir unglingar hittast á leiksvæðum og hafa meðferðis plastpoka með Mahou bjórflöskum brúnum (lítri) og Don Simon-fernurauðvíni (lítri). Og svo er sötrað. Ég var frekar rólegur í tíðinni í den en þá eins og ná var stíll yfir kalli; Absolut vodki í appelsínusafa. Don Simon-fernurauðvín (lítri) kostar innan við evru. Absolut-aumingi kostar örugglega vel yfir 2000.

Ágætu lesendur (báðir) ef einhver vill skella sér til heitu landanna frá 1.-20. júlí. Opið hús. Öl, ostar, skinkur og sundlaug. Gin og tónik úti á svölum.

Lifi Spánn. Niður með Rómverja! 

 

 

 

Athugasemdir

[Unnar (IP-tala skráð) 23.6.2008 kl. 13:13]

Ú á Spán og ú á Real Madrid. Ég verð að viðurkenna það að ég hélt innilega með Þjóðverjum gegn Portúgal. Gott að Ronaldo skuli vera úr leik. Svo ég tali nú ekki um myrkrahöfðingjann Scolari.

Hefur þú séð myndirnar á www.svp.is af körfuboltaleik FIMMA og 68-kynslóðarinnar? Þetta var eins og í Hringadróttinssögu. Þeir sendu nýtt og nýtt lið inn á völlin en FIMMA tókst að verja körfuna af miklu harðfylgi.

[Magnús (IP-tala skráð) 30.6.2008 kl. 16:07]

Liggur þjóðin öll í þynnku?