Dagur

Segir fátt af kleinum.

 

36 ára fara menn að finna fyrir hnjám eins og Perry Smith sem var tekinn af lífi 36 ára fyrir að myrða Clutter-fjölskylduna. Hann gekk fyrir aspiríni - upp að hnjám.

Samkvæmt ævisögu Davíðs Stefáns bauð hann gestum upp á gos eða brennivín; að bera fram kaffi var kvenmannsverk.

Ég mætti í skólann - tómur kofi - engin kennsla í dag: þið getið farið heim og slappað af, tekið ykkur sturtu eða farið í bað. - Ég fór í sund. Það er í mörg horn að líta áður en farið er í sund. Gleymi maður sundhettunni eða sandölunum er maður dauðans matur. Ég held (án gríns) að það væri í lagi að gleyma sundskýlunni - bara að maður gleymi ekki sundhettunni og sandölunum.

Rosalega er pirrandi að drukkna alltaf við tilraunir til snúnings - neyðarlegt þetta tilstand alltaf og alltaf er ljóti sundlaugarvörðurinn á vakt, veifandi leyfi til munnviðmunnveitingar. 

Er of seint að byrja að æfa sundballet? Ætli maður fái nefklemmu á fyrstu æfingu eða þurfi að fara í nefklemmubúð niðri í Madríd?

Í búðinni er maður alltaf gegnumlýstur áður en maður vogar sér inn með eilífan innkaupapoka. Ég fer alltaf sama hringinn - enda alltaf í mjólkinni grænu og.. æ ég veit það ekki. Það eru hundrað kassar - 20 eru virkir - 10 starfsmenn eru vakandi - það gekk ekki að skanna tómatana - sleppum þeim. Það er ekki annað hægt. Annað kallaði á ferðalag, ævintýri.

1. þáttur síðustu seríu af Soprano. Ást hatur sambandið við sjónvarpið. Gamla pælingin: það er betra að lesa lélega bók heldur en að horfa á lélegt sjónvarp. Lífseigt. Það er líklega ekkert betra en Sopranos. Tony er Egill Skallagrímsson. Sturlaður en samt eitthvað svo geðslegur. Ó, hvað þetta er geðslegur maður.

Ef það fréttist að búið sé að tæma laugarnar heima og farið sé að nota þær undir þorskeldi - þá kannski þá sest ég hér að. 

Segir fátt af kleinum og öðru sætabrauði.

 

 

Athugasemdir

[tobba (IP-tala skráð) 3.11.2008 kl. 22:05]

Get bara sagt þér að það er talað um byltingu og gálgastokk í öðru hverju orði sérstkaklega á eyjan.is

Mæli hins vegar með Dagvaktinni, hún klikkar ekki, Guðisélof fyrir íslenskan húmor, hann er þó skárri en sá sænski.

Gangi þér vel í sundinu, man hvað þetta var flókið þegar ég bjó úti í Frakklandi, bara betra að fara á ströndina.

 Kveðja Tobba Brynjuvinkona

[Brynja (IP-tala skráð) 4.11.2008 kl. 07:54]

mig dreymdi þig í nótt, þú talaðir við mig í gegnum tölvuna og einhverra hluta vegna var það stórmerkilegt þó vissulega sé það hversdagur í dag.  Pældu samt í því Arnar hversu auðvelt yrði fyrir okkur að róa á miðin og afla hráefnis í saltfiskgerðina okkar.

[Unnar (IP-tala skráð) 4.11.2008 kl. 15:22]

Ég er sammála þér með Tony Soprano. Þessar mafíusögur eru auðvitað eins upp byggðar og Íslendingasögurnar. Var að enda við að klára síðustu seríuna. Mér finnst Soprano fjölskyldan hafa betra siðferði en íslenskir bankamenn.