Er að fara að fara að fara

Fyrst, viðbrögð við nokkrum athugasemdum:

 Jú, svp, það passar, jólasveinninn hér heitir Felix Navidad og er í raun risavaxinn köttur, aðstoðarmaður hans er dvergmenni með þrettán fætur. Er þarna jólakötturinn kominn? Merkilegt hvað þetta tengist allt skemmtilega.

Á þrettándanum er heimilskettinum síðan slátrað og settur út í paellu ásamt rækjum, kjúklingi og allskyns góðgæti. Í Andalúsíu er til siðs að stela hundi nágrannans í þessum tilgangi - mikill handagangur í öskjunni oft á tíðum. í Segovia lauma menn sér hins vegar inn á elliheimilin...

Sinn er siður í hverju landi. 

Jú, systir, ég skal vera í bílskúrnum.

 

Í tíma í gær sögðu nemendur frá heimabæjum sínum. Rosalega áhugavert, hrjót. Ein stelpan er frá Kairó, hvað sem það nú er. Og talaði digurbarkalega um staðinn - hvort hún sagði ekki eitthvað um "Móður allra borga". Þá sagði ég nú bara stopp og stóð á fætur. (lausleg þýðing) "Akureyri, höfuðstaður Norðurlands, vagga miðnætursólarinnar, upprisa holdsins í H-100, niðurlot holdsins í heitu pottunum, frítt í strætó (Kaíró??), KA-Þór, Sverrir Páll (í Kairó?, aldrei), Kári Árna ha?, skíði með Helenu, Hellas með Birni, Bjarnarveiðar með húsvíska uppstopparanum, nonstop mannfjöldi á Römblu Akureyrar, Nanna Leifs? Ha? Saxófónsólo Finns Eydal. Baraflokkurinn? Ha?" Þarna var henni greinilega brugðið, hún þekkti greinilega til Baraflokksins og gat ekki boðið betur. Kairó? Rosalega mikið af svona steinum sem búið er að raða upp í form, vá. Hún dauðskammaðist sín stelpan og reif síðan upp veskið og lét mig fá 1000 evrur og bað mig um að kaupa far með fyrstu vél til Akureyrar.

Síðan hélt ég áfram að tala og sífellt fleiri rifu upp veskið og heimtuðu það sama og egypska stelpan. Þýsku óperurnar sátu þurrar og snýttu sér með krosslagðar hendur (hvernig er það hægt?). Þær ætluðu ekki að láta sannfærast. En þegar ég var búinn að lýsa "Orgíu unglinganna" sem fer fram í byrjun ágúst stukku þær líka upp á fagnaðarvagninn og hylltu mig og hylltu Akureyri.

"Á skíðum skemmtégmértrallalala..." 

Athugasemdir

[Heiðdís Smáradóttir (IP-tala skráð) 5.12.2008 kl. 11:05]

Við eigum Lindu, við eigum KEA......rallallarallaralla Amaro og SÍS.  Það var nú gaman í Rúllustiganum í þá daga.  Sem betur fer er loksins kominn aftur rúllustigi á Akureyri, annars myndu börnin aldrei nenna með mér á Glerártorg.  Amma vill enn hvergi versla nema í KEA og fer þess vegna alltaf í Hrísalund (sem heitir núna Úrval er í eigu einhverra sunnlendinga).....svona getur þetta verið.  Ég er alveg sammála þér að Akureyri er fínn bær og Baraflokkurinn er ekkert til að skammast sín fyrir (en hvað með Stuðkompaníið??). Takk fyrir að skemmta okkur hinum með þínu eðal-bloggi (eina bloggið sem ég nenni að lesa).  Svo langaði mig að stríða Brynju aðeins og vera á undan henni með athugasemd.  Kærar kveðjur frá Eyri þeirri sem við Hjalta er kennd.

[Brynja (IP-tala skráð) 5.12.2008 kl. 19:50]

Tapa glöð fyrir Heiðdísi og þigg silfrið, brosi í gegnum tárin en betra er að tapa fyrir sér betra fólki en verra.  Ég er pínu svekkt að þú hugleiddir ekki sambýlið við okkur í smárahlíðinni, Arnar ég var búin að skipuleggja matseðilinn og skiptingu þrifa á laugardögum.  Spurning kannski bara að við Valur fáum ruslageymsluna hjá tengdó í Snægilinu, þar er líka hægt að finna sér ódýran mat og þá er stutt í bílskúrinn. 

Já Akureyri, litla, sæta ljúfan með þunglamalegum sunnudögum  og rækjusalati íbland, þar sem fólk horfir forvitið ofan í innkaupakörfur manns í bónus til að tékka á  hvað sé hjá manni í matinn, þar sem hægt er að fá sér djúpsteikta pylsu með kryddi, þar sem hægt  er að mæta sex um morguninn í ræktina og fara í sund með litlu umstangi og synda í þokkalega heitri laug.  Det e najs eins og skánverjar segja.    

ps: hef verið í Kairó, þar fást ekki djúpsteiktar goða pylsur með kryddi

[Auður (IP-tala skráð) 9.12.2008 kl. 12:50]

Jæja... hvenær koma nýjar myndir af litlu fjölskyldunni?  Velkominn niður úr fjöllunum annars jólasveinninn þinn :)